Pyrenaica 292 (2023)

Euskal mendizaletasunak ondare propioa sortu du bere historia luzean. Esku artean duzun aldizkaria, mundu mailan zaharrenetarikoa, ehun urte betetzear dago. Euskal Herriko gailurretan mila postontzi baino gehiago daude, eta haietan oraindik txartelak sartzen dira igoerak egiaztatzeko. Mende bat baino gehiagoan zehar, ehun mendien lehiaketa 4500 mendizale baino gehiagok burutu dute.

Orain, mendi elkarteetan jarri nahi dugu arreta. Aldizkari hau irakurtzen dugun gehienok elkarte bateko kide gara. Batzuetan, esaterako, antolatzen dituzten txangoetara joaten gara, edo dibulgazio-jardueretan parte hartzen dugu, elkartearen egoitzara joaten gara federazio-lizentzia tramitatzera, mendiko materiala alokatzera, liburuak eta mapak kontsultatzera edo adiskideekin hitz egitera besterik gabe.

Elkarte gehienek irteerak proposatzen dituzte asteburuetan. Ez da plan txarra igande baterako: euro gutxi batzuen truke, autobusez eramaten zaituzte haranez haran zeharkaldi bat egitera, lagun artean eta ingurunea ezagutzen duten pertsonek gidaturik.

Hemen, munduko leku batzuetan ia tradiziorik ez duen elkartze joera hori sakon errotuta dago mendizaleon artean. Izan ere, ezin dugu ahaztu Euskadi eta Nafarroako Alpinismo Federazioa sortu zuten mendi elkarte batzuek jada ehun urte bete dituztela, eta beste batzuek, datorren urtean ospatuko dutela mendeurrena.

Mendi elkarteek funtziona dezaten, jendea behar da, jakina. Ez dago elkarteko ekintzez eta abarrez arduratzen den “adimen artifizialik”, boluntarioek kudeatzen dute, borondate propioz.

Mendi-ondare hori guztiona da. Ahal dugun neurrian, lagundu dezagun ondare hori iraunarazten. Ez da zaila: gure gustuko eta mailako txangoren batera joan gaitezke, borondate oneko gidari gisa lagundu dezakegu edo zuzendaritza-batzordeari lagundu diezaiokegu. Denbora pixka bat baino ez zaigu kostako, eta, ordainetan, gure aletxoa jarriko dugu ondare hori bizirik mantentzeko.

Mendiak hor egongo dira beti (orogenia eta bolkanismoa lagun); mendizaletasunak, ordea, ez du izateko arrazoirik pertsonarik gabe, eta mendi elkarteek ere ez.